قائمة المدونات الإلكترونية

الثلاثاء، 27 أبريل، 2010

عن صديقتي ريهام






بصوا يا جدعان بجد وبأمانه أنا لو اعدت اتكلم من هنا لبكره عن ريهام مش هاخلص بجد ...



أصل البنت دي صاحب صحبه بجد و وقفت جنبي كتير يمكن ناس من بعيد ما يحسوش بدا بس كفاية عليا ان انا الي لمساه بإيدي وعيني وروحي وقلبي .



كفاية ان هي لما بتيجي فرصة حلوة ليها بتفكر في اصحبها بجد ,زاي ما بتفكر في نفسها .



وقفت جنبي كتير بصراحه كنت كل ما اغلط تروح مدياهوملي ماتسميش عليا وهي دي الصداقة بجد .
( أهو هو دا شاروخان الي عامله ازمه لريهام)


انا عارفه ان ريهام بتحب شاروخان ...تصدقوا العباره دي او الجمله دي فيها نغمه رائعه بجد ....ريهام بتحب شاروخان وشاروخان بيحب ريهام ...طبعا هي نفسها في كده والله انا كمان نفسي ولو معايا الفانوس السحري والله كنت جبته ليها او اخليها الزوجه التانيه ليه ...أأأأأأأخ لو بايدي بجد كنت هاعمل كده ....كنت هاخلي ريهام احسن مذيعه لانها تستاهل دا واساعدها عشان تطلع مامتها العمره والحج واساعدها في تحقيق احلمها زاي ما هي بتساعدني في تحقيق احلامي .






انا وريهام بتجمعنا ذكريات ولحظات حلوة قوي قوي نفسي بجد تدوم وبصراحه انا خايفه في يوم الذكريات دي تتبخر ...عشان كده هاتكلم عن اجزاء منها ...وهاحكي عن اجمل حاجة في صدقتي بيها عارفين ايه هي؟ ...ان برغم ان احنا بنزل مع بعض الا اننا مش بنطول في الزعل وبنصارح بعض لان دا واجب اي اتنين صحاب يعملوا كده....كمان بنتحمل بعض وبنسمع لبعض ومش بنزهق حتي لو احنا زهقانين وكفرانين لان دا واجبنا برضوا ....وكمان بنختار الوقت المناسب الي كل واحد يلعب فيه دور المتكلم والتاني يبقي المستمع لان دا لازم يحصل بين اي اتنين اصحاب ....الاحتواء ...انا احتويها ...هي تحتوينا ...احنا الاتنين نحتوي بعض ...تحولنا من "أنا " الي "نحن".






نرجع تاني لذكرياتي مع ريهام واجمل لحظات حياتي معاها بقي .....يوم ما روحنا المعهد الثقافي الهندي ...عشان نعرف شاروخان جاي مصر ولا لا ....ويوم ما تصلت بيا وانا في الشغل ههههههه وتقولي انها قدام الفندق الي شاروخان نازل فيه وبتعيط لانها مش عارفه تقابله ....ولا لما روحنا ماكدونالز وما كنش معايا فلوس وكنت جعانه عزمتني علي الغداء ....والداااااااااايت الي نعمله سوي واخربه انا ههههههههههه....لما جات لي اول ما جيت من السفرررر وقضت معايا وقت جميل...لما خمسنا انا وهي في سندوتش جمبري وجيه واد من الي بيشتغلوا معانا في الذاعه رخم علينا والله نسيت اسمه ايه؟



( دي انا ام نظاره وريهام ام حجاب وبتبسم في وجكم والي في النص عزيزه)


احكلكم علي حاجة كمان ....انا مشرده للبنت ريهام دي علي الاميل والفيس بوك والتاجد اااااايه الله ينور ...علي الفيس كتبت " هوبتي تحب شاهد كابور وريهام عبد المنعم تعشق شاروخان " ...وعلي الاميل "ريهام بتدوب في دباديب شاروخان" بدرجة ان صديقتي هند كانت بتكلمني اول امبارح وشافت صورة ريهام قالت لي " هي دي خطيبة شاروخان؟" اخدتي اللقب اهو يا ستي خطيبة شاااااااروخان .



دا كمان أيه يا ريهام ...الواد شريف زميلي لقيته بيقولي واحنا بندردش ..."والفنان الي بتحبيه من الهند دا اسمه ايه ؟؟ شاروخان اه ...انا شوفت فيلمه وعجبني موت " قلت له اسكت دا مش حبيبي دا حبيب صحبتي ههههههههههههه.



المهم وانا وهو بندردش وبيحكي عن رحلة اسكندريه وبيجيب سيرت البحر وكده وجاب بقي سيرت شاهد كابور وذكر اسمه بطريقة خطأ لقيت نفسي برد عليه ....






" البحر سأل عليا وبعت لي بوسه في المنام ....قالي يا حلوة فينك من زمان ؟ ....قلبك اتسرق مينا خطفه الواد شاروخان؟ ...قلت له اسكت دا مخطوف من زمان ...بس الي عند شاروخان قلب ريهام ....أما قلبي انا وروحي ملك لواد فنان ...لا هو شاهد كابور ولا هو شاروخان ...واد من اهل المغرب كمان ...متشحططت بين مصر ودبي ولبنان ...اقوله بحبك يقولي ميرسي ...اقوله وحشتني يقولي متشكر ياسلام ...كأني مش انسان".






طبعا مش شرط لاني بموت فيه هو يحبي هههههههههههه عارفه والله يا ريهام دلوقتي زمانك بتقولي " كانت من يومين بتقول انا خلالالاص مش هافكر فيه ومش هاعمل ومش هاسوي ....واهي دلوقتي حالا الان بتتكلم عنه تاني ههههههههههه أأأأأه ياني ".






ريهام في النهاية انا عايزه اقولك ان انا بحبك قوي قوي قوي وربنا ما يحرمني منك خالص مالص بالص وادعيلي علطول لان انا محتاجه دعائك ليا.






بحبك



اختك وصحبتك



هوبتي .

هناك 26 تعليقًا:

  1. السلام عليكم ورحمة الله وبركاته

    هبه ازيك يا يا غاليتى يارب تكونى بخير

    ماشاء الله عليكى فيكى منى كتير اووى والله انا متلك وافيه للاصدقائى اووى لدرجه كبيره وبحبهم كتير

    انتى انسانه جميله اوووى حبيتك اووى من كلامك الجميل عن اصدقائك ده يدل انك شخصيه جميله وانسانه محترمه وجدعه اووى
    وانا احب اعرف الشخصيات اللى زى كده اسمحيلى اضيف مدونتك عندى واقبلينى اكون صديقه ليكى

    ربنا يخليكى للاصدقائك ويارب تفضلو حبايب عبى طول ولا يفرق بينكم ابدآ يارب
    دمتى ودام اسمك وقلبك

    تقبلى مرورى
    اختك شذا

    ردحذف
  2. علي فكره
    ربنا يخليكلك انتيمتك
    وربنا يخليلي انتميمتي
    مهو ليا انتيمه نفس الكلام تقريبا بس بالعكس
    موش بتحب ممثلين وكدا
    بس بنعمل انا وهي عماااااااااااااااايل
    انتيمات فبعض بقي
    هههههههههه
    ربنا يخليهم لينا يااااااااااارب:)

    ردحذف
  3. حبيبتي شذاااااااااااا منوراني طبعا واكيد انا يشرفني وانا هاضيف مدونتك الان حاااالا عندي
    وصدقيني الحياة بلا اصدقاء اوفياء بجد ما تبقاش حياة وعلي فكره ريهام مذيعه في راديو حريتنا علي الانتر نت ليها برنامج بيجي كل يوم اربع اسمه اون كافيه ياريت تسمعيه اليوم بما انك من القاهره
    اكتبي علي جوجل راديو حريتنا وهو هايطلع

    ردحذف
  4. سووووني بجد بجد منوراااااااني
    بصي انا وانتيختي بقي بنعمل عماااااااايل سوده زايك كده انتي وانتيمتك
    علي فكره احنا لازم نلم بعضينا في مره ونخرج كلنا وتبقي خروجه للناس الانتيخ ونعمل يوم نسميه "يوم الانتخه " هههههههههههه ويبقي عيد ونحتفل بيه وكل اتنين انتيخ يانتخوا سوي هههههههههههه
    ايه رأيك؟

    ردحذف
  5. حاضر ياقلبى هسمعه انهاردا

    انا بجد يشرفنى
    ومبسوطه بيكى اخت وحبيبه

    يارب لا يحرمنى منك يارب

    أحبك فى الله

    ردحذف
  6. ربنا يديم الصداقة والمحبة ما بينكم
    وربنا يديم المعروف
    تحياتى

    ردحذف
  7. لمس الاحباب
    مشكور لمرورك والله يديم المعروف بين العباااااد اجمعين

    ردحذف
  8. انا بقى بحبكم انتم الاتنين.. ربنا يديم عليكم صداقتكم ومايحرمكوش مني

    صبري سراج

    ردحذف
  9. السلام عليكم

    ازيك يا قمر
    ربنا يديم بينكم المحبه يا رب
    بجد احلى شىء الصداقه

    بحد سعيده اوى بمرورى فى مدونتك وسعيده انك جاوبتى التاج عندى

    وردك على السؤال ده عجبنى اوى

    لو خيروك بين حبيبك وبين اعز صديق فمن تختار ؟
    مش هختار لان انا بعتبر دي مساومه رخيصة جدا


    بجد معاكى حق

    وربنا يرحم والدتك يا رب ومتزعليش وادعيلها كتير حبيتبى


    وربنا يخليلك القطط بتاعتك


    ويا رب تتزوجى قريب انتى وعبد الفتاح امين يااااااااا رب

    ردحذف
  10. هبه حبيبتى بحبك والله وبموت فيكى وطبعا بموت فى شاروخان كمان ههههههههههه ولسه كنت بتفرج على فيلم بارديس بتاعه حالا وكنت هاتجنن ومكهربه البيت كله لحد الفيلم ماخلص ..بجد ربنا مايحرمنا من بعض ابدا ونفضل اصحاب ونفضل مع ذكريتنا الجميله ونكون ذكريات اجمل وفى الاخر بقولك اشكر
    فضحتى امى يا هبه هههههههههههههه بجد ربنا يخليى ليا انتى وشاروخان يارب ههههههههههه

    ردحذف
  11. شارو خطيب 1000000000000 واحده على فكره
    احب اقول لريمو متزعليش من هوبا واديها واحده شهيد كعبور

    ردحذف
  12. صبري سراج واحنا بنحبك برضوا وربنا لا يحررررررررمك مينا ان شاء الله هههههههههههههههه
    نفضل مطهقينك

    ردحذف
  13. وعليكم السلام
    ازيك يا ايمان عامله ايه؟ انا الحمد لله بالف خير

    بصراحه ردك عليا عجبني جدا جدا وخصوصي انك دعيتي ليا دعوتين احب علي قلبي اولهم ان انا وريهام نفضل اصحاب وتااااااااااااااااانيهم اني اتجوز عبد الفتااااااااح اااااااه ياني ياني ياني
    انا اول ما شوفت دعوتك اعدت اضحك وقلت يااااااارب يااااااارب اسمع منها يارب بحق حبيبك المصطفي .

    اما بالنسبه لردي علي التاج بتاعك فا انا عملت الي عليا لان دا وجبي كا صديقة ليكي عن طريق التدوين لان انا حابه تعرفيني واعرفك واتمني ان صداقتي بيكي تطور مع الوقت والزمن

    ردحذف
  14. رييييييييييهاااااااااااااام حبيبتي وحبيبت أيامي ههههه (حته من اغنية شادية فارس احلامي ...حبيبي وحبيب ايامي )
    وحشتيني موت والله والحلقة اليوم كااااااااااانت راااااااااائعه جدا جدا جدا فووووق ما تتخيلي
    وربنا ما يحرمني منك
    ويوم الخميس علي ام بي سي ماكس جاي فيلم لشاااروخان

    ردحذف
  15. المجهوووووووووووول
    شاروخان خطيب لكل البنات اه معاك حق لكن مش هاااااسمح لحد يخطف شاهد كابور مني انا خلاص عقدت العزم اخطف فيل واروح علي بووووومباااااي

    ردحذف
  16. ربنا يخليهالك ياهبه
    أجمل حاجه الصداقه
    خدى بالك بس إنتى منها وطول ما إيدك في إيديها الذكريات والحاضر والمستقبل هيفضل
    وبالنسبه لشاروخان ده أنا عارفه بنات كتيرررررر بتموت فيه
    هنجوزه مين ولا مين
    خلاص بقي يحسن ريهام تسمعنا وتزعل
    مش هجوزه غيرها
    ربنا يوفقك يا هوبتى
    وإن شاء الله يدوم التواصل بينا

    ردحذف
  17. هوبتي
    ريهام بتحب شاروخان
    عاااااااااااااااا
    كل الناس بتحب شاروخان مش هي بس :)

    ربنا يديم عليكي كل الأصدقاء اللي ماليين حياتك
    الصداقة دي نعمة ربنا ما يحرم حد من صحابه

    يا منتي
    يااااااااااااا منتي
    شيلي كلمات التدقيق دي مطلعة عيني

    ردحذف
  18. ان شاء الله يا حلمي وان شاء الله ربنا ما يحرمنا من بعض دول ما احنا جنب بعض وايدينا في ايد بعض و واضحين مع بعض
    اما بالنسبه لشاروخان ونبي لو عرفتي تجوزيها لشاروخان تكسبي فيا انا ثواب انا كمان وزاي ما جوزتيها لشاروخان جوزيني عبد الفتاح
    ههههههههههههههههههههههه
    بحببببببببببببببببببببببببببببه يا بابا بحبببه

    ردحذف
  19. دكتوره ستيته اولا منوراني
    وثانيا ميرسي واكيد الصداقه دي نعمه من نعم الله علينا في ناس محرومين مينها والحمد لله ان احنا مش منهم

    ثالثا ودا المهم هو ايه التدقيق دا ؟ ايه الي مطلع عنيكي ونبي لحسن انا جديده في التدوين ومش فهمه

    ردحذف
  20. السلام عليكم
    ازيك

    الصداقه شىء ممتاز جدا
    ربنا يكرمكم ويسعدك انتى وصاحباتك
    الصديق الوفى اصبح صعب وجوده فى الزمن ده

    ملحوظه بس فى الاخر
    معلش انا مضطر اقولها لك على التعليق
    انا استنيت شويه عشان يبقى اللى هايشوف التعليقات يكون شافها
    واصبح اللى يشوف تعليقى عدد قليل
    لانى مش لاقى ميل ليكي
    المهم
    ماطولش عليكي
    معلش انا انصحك انك تمسحى اسم مدونه (امراه مثليه ) من قائمه المدونات اللى واضعاها فى مدونتك
    لان ده بيعتبر اعلان لمدونتها
    وهى للاسف مدونه تدعو للشذوذ ومليانه كلام ممكن نسميه فى صيغه مؤدبه انه كلام خارج
    فانا انصحك انك متكونيش سبب فى الاعلان عنها

    اسف للنقد
    انتى طبعا حره
    لكنى انصحك كاخت لى
    ربنا يكرمك ويسعدك

    ردحذف
  21. استاذ محمود فوزي
    اولا انا يشرفني مرورك جدا جدا وكمان انا سعيدة بنقدك انا مش زعلانه منه بالعكس حضرتك شايف شيء من وجهة نظرك انه مش حلو فا بتنصحني من باب الاخوه
    لكن انا بعتذر انا مش هامسح المدونه ...لاني بصراحه ومن قرأتي للبنت دي اكتشفت قد ايه هي صريحه و واضحه مع نفسها والاخرين
    وانا كل مره بقرا ليها بتعلم منها الوضوح والصراحه
    انا بحترمها كا كاتبه جدا جدا هي وكاتب مثلي اسمه كريم لان بصراحه هو كمان كتاباته رائعه جدا وواضحه قوي وصريحه جدا .
    واحب اوضح ليك ان هناك فرق بين كلمة شاذ ومثلي .

    شكراً لمرورك واتمني الا تحرمني منه
    وارجوك لا تحرمني من نقدك لانه اكيد هايفدني

    ردحذف
  22. و من كان منكم بلا خطيئه فليرمها بحجر

    ردحذف
  23. يارب يديم الصداقة والاخوةدايا دايمازونصيحة مني كفاية تشريد للبنت خلتيها مخطوبة له طب هتتجوز ازاي؟؟؟!!!!افرضي حد شبه شاروخان حبها يعمل ايه وانتي معرفة الناس انهابتحبه
    هههههههههههه

    ردحذف
  24. أزال المؤلف هذا التعليق.

    ردحذف
  25. هبه الحياه
    اشكرك جدا على تقبل النقد
    اعتذر جدا للتاخر لانشغالات كثيره

    معلش
    هل معنى كلامك ان لو حد عمل موقع وقال بكل صراحه وفخر انه بيشرب خمره وبيتعاطى مخدرات
    فاننا نعجب بصراحته ونعمل كمان اعلان له
    اعتقد مينفعش

    مفيش فرق بين شاذ ومثلى
    دي كلمات لمحاوله تلطيف المعنى على الناس
    زي كده مابيسموا الخمور بانها مشروبات روحيه

    برضه معلش المدونه بتاعتها مليانه كلام خارج كثير
    فحتى ولو كان اى حد بيتكلم فى موضوع فانه يختار الالفاظ

    ومعلش مش كل الرجاله مفتريه
    فيهم الكويس وفيهم الوحش


    اسف للنقد
    اشكرك لتقبل النقد
    اتمنى انك متكونيش زعلتى مني
    ربنا يكرمك ويسعدك

    ردحذف
  26. مرحبا
    لدي عرض مغري لي ولكم
    اشرايكم اتزوجكم الثلاثة مع بعض واكسب فيكم رضى ربي ومهر كل واحدة فيكم عشرة الآف دولار امريكي وسكن في الخارج خارج مصر منتظرا ردكن

    ردحذف

هاي عليكم ازيكم؟ انا الحمد لله بخير واحب انكم تكونوا بخير

بصوا بقي مش بحب المجاملات ومش بعرف الف وادور ولا ازوق الكلام فا ياريت لو سمحت الي هايسيب لي تعليق يتكلم بصراحه ولو في اي ملحوظه يقولها بس بلطف لان انا الكلام الحاد مش بيجيب معايا نتيجه ومش بفهمه لا دا بيخليني ازعل واعيط

ميرسي لزوقك وحسن الاستيعاب
حبيبتكم
هوبتي