قائمة المدونات الإلكترونية

الأربعاء، 13 أكتوبر 2010

سمك بالنشا


شريط حياتي كله وانجازاتي الحربيه والفنيه والمعماريه في المطبخ عدي قصاد عيني لما الست ام محمد قالت لي ان الدقيق الي قاليت بيه السمك مش دقيق وانه نشا .... افتكرت اول مره وقفت فيها في مطبخ بيتنا اللذيذ جدا الديق موت الي ما يحتملش غير شخص وااااحد يقف فيه بيفكرني مطبخنا دا بالبناطيل الاسكيني الي البنات بتلبسها بالبيسه يالي ما علينا دع الخلق للخالق ... معلومه مهمه جدا مش لازم اخبيها عليكم المطبخ بالنسبه ليا زمان كان عباره عن ترفيه وتضيع وقت ...رغبه كده في تحطيم الوقت الممل والاستفاده منه في شئ مفيد لكن كان دخولي ليه بالنسبه لامي الله يرحمها والست ام محمد كالعدوان الثلاثي علي مصر علي الحرب الاهليه في امريكا مع حروب طائفيه مش خفيفه في الخلاصه لما بخرج من المطبخ بيكون في حاله ما يعلم بيها الا ربنا من الاخر . اول مره :- اول مره اقف فيها في المطبخ عشان اعمل شوربة شعريه اااااااخ انا اليوم ده لا انساااااه ابدا ما كنتش عايزه ماما توريني عملي قد ما انا عايزه الموضوع يكون شفهي عشان انا اطبق لوحدي .....طبعا عملت زاي في اغنيه طلع الفجر وما سمعتش كلام ماما ولا صبرت علي روحي لحد ما تخرج من الحمام مما ادي الي قاعده كبيره مكونه من الشعريه السوده المحروقه ويعني يا عيني عليَّ كنت ملبوخه اضيع ايه قبل ايه اضيع الريحه ولا الحله المحروقه !!!! ماما الله يرحمها وقتها لا كانت عارفه تضحك او تبكي من صدمتها يا عيني يا حول الله يارب كل الي طلع منها بعد ما وجها اتخطف واصفر " ايه دا ؟" ماقولكومش بقي الابداعات بعد كده ما وقفتش كان ليها توابع من بيض محروق لبطاطس محروقه لبصل محروق للحمه كانت بتتحمر واتحرقت والانجازات ما كنتش بس في دول لا والحمد لله احنا دخلنا علي الحلو حرقت الكيكه والرقاق بالحليب . عارفين مشكلتي مش بعرف اجامل نفسي يعني لو عملت شيء وطلع وحش مش بمد ايدي عليه ابدا . بعد مراحل الفشل دي كلها والخساير الي كنت بخسرها كانت بتعمل عندي حاله من الكأبه اولا وبعدين التحدي ....كان جزء جوايه مقتنع اني فاشله جدا وجزء اخر كان بيقولي لا عادي وايه يعني ياما ناس فشلت ونجحت بعد الفشل ومش بس كده كان في حاله من العصيان علي فتره من الجفاف بطني كانت بتعاني منها صوت مني وقالت بووووووووووووووووريه يا خواتي بوريه من الفول والبطاطس والكشري وكنتاكي ...مش بس بطني هي الي كانت بتشتكي دي كمان عنيه وذاكرتي لما لقيت نفسي نسيت شكل الطبيخ ايه هو ؟؟؟ جات لحظة التحدي الي قررت فيها ان اليوم هايكون نهاية الفشل وبداية صفحه جديده مليئه بالنجاحات هي صحيح مش مليئه قوي ...يعني نقدر نقول اني لسه مش بعرف اعمل الرز ....بس بقيت بعمل اجدع فريك . ابتكرت من الفريك حاجات كتيره جدا ...فريك محشي ...فريك مع الخضار ....شوربة فريك الي اتعلمتها من مرات اخويا ....طاجن فريك . لما سمت العنان لنفسي ابدعت ....ايوة ابدعت تعاملت مع المطبخ والطبيخ كانه حاله فنيه ....حاله من الجنون عملت اصناف جديده زاي بدل الكول سلو بالسكر بعمله بالملح واديته اسم كولو ملح ....والحمد لله عجب ناس كتيره ....زاي طبق عشق الفاصوليا ودا من اختراعي برضوا , كل طبق كنت بعمله كنت بحاول انقي له اسم جميل زاي القصة الي بكتبها وبدور ليها علي اسم وزاي الرسمه الي برسمها وبحاول الاقي ليها اسم ... لما خلعت عن عيني نظاره قديمه بتخليني اشوف الحياة كانها عاديه وممله ....لما خلعتها شوفت الحياة غريبه واطريت البس نظاره تانيه تفهمني الحاجات الغريبه الي مش وضحالي واكتشفت ان الحياة كلها عباره عن ابداع فني والابداع دا او الحاله دي مش بس في الغناء والتمثيل والكتابه والرسم والتصوير ....لا دي كمان في حياتنا اليوميه في الطبخ في الكنس وترويق البيت وتربية الحيوان ...في السواقه ...في العلوم والتسوق والسفر . أأأأأه معلومه مهمه ....السمك لما تعملوه مع النشا بيطلعه مقرمش وجميل . مع خالص حبي هوبتي

هناك 11 تعليقًا:

  1. هههههههههههههههههه
    والله برافو عليكي
    انا بقى في ما بيني وبين المطبخ عداوه
    مش بحبه خالص والظاهر كده هو كمان مش بيطقني
    أخري معاه كوباية النسكافيه كل يوم الصبح
    وبعدها لابشوف وشوه ولا بوريه وشي

    ردحذف
  2. هههههههه
    بس كان واضح من كلامك فى الاول انك كنتى رائعه فى قسم المشويات
    من شعريه مشويه الى كيكه مشويه
    جميل جدا ههههه
    احلى حاجه فى البوست لحظه التحدى لما لما قلتى انك قررتى فيها ان اليوم هايكون نهاية الفشل وبداية صفحه جديده مليئه بالنجاحات
    لان الجمله رغم انها وسط القصه مداريه
    لكن تعلم اى انسان
    تسلم ايدكى

    ردحذف
  3. هوبتى

    اهنئك

    لكى مستقبل مطبخى هايل فى انتظارك

    ردحذف
  4. اللى يقرا البوست دا يا هوبتى يقول انك مبتعرفيش تطبخىّ! ميعرفوش اننا بنبقى ناقص ناخد الحلل معانا واحنا مروحين من عندك!!
    ياجماعة هبة طباخة محصلتش بجد
    وبالنسبة للسمك فانا كنت من سعداء الحظ اللى داقوه وفعلا كان مقرمش بس بالنسبة للطعم الجامد بقه فدا اكيد مش بسبب النشا:D:Dانزلى بالخلطة يا هبة:)))

    ردحذف
  5. ههههههههههه انا كل اللى صعبان عليا الحاجات اللى اتحرقت طب ذنبها ايه تولع كده ههههههه
    عموما بجد كلامك جميل وعندك حق الابداع فى كل شىء فى حياتنا انشاالله حتى فى لف الطرحه....
    بس مقلتيشى نعمل السمك ازاى بالنشا اصل مش متصوراها خالص ههههه
    وبجد ياريت تكتبى حاجات من ابادعاتك علشان انا بحب اتعلم الحاجات الجديده

    ردحذف
  6. اول مره ادخل مدونتك لكن ما اظنش انها هتكون الاخيره...مجونتك لطيفه قوى ....

    تحياتى

    ردحذف
  7. ههههههههههههههههههه
    عارفة ياهوبة بغض النظر عن حوار الطبيخ دا
    انتي اهم حاجة طلعتي بوجهة نظر في الحياة واتعلمتي حاجة منه وهي انك تتعاملي مع كل حاجة بحب وبنظرة تانية نفس المبدأ اللي بيقول حب ماتفعل حتى تفعل ما تحب تحياتي ليكي
    وحلوة فكرة السمك بالنشا دي ابقى اجربها انا بقى

    ردحذف
  8. أيه يا هوبتى

    فييييييييييييييييينك انا غيبت معلش بس انتى غيبتى خالص

    يارب يكون الكتاب هو اللى معطلك

    و انا عاوز نسخة ها

    (:

    طمنينا عليكى

    ربنا معاكى

    ردحذف
  9. وحشتيييييييييني .. بجد

    انتي شاطرةاوي ياهوبتي تعرفي تعلميني بس بلاش شعرية والنبي احسن ممكن مش نلاقي حدينقذنا

    عودآحميدآ

    ردحذف

هاي عليكم ازيكم؟ انا الحمد لله بخير واحب انكم تكونوا بخير

بصوا بقي مش بحب المجاملات ومش بعرف الف وادور ولا ازوق الكلام فا ياريت لو سمحت الي هايسيب لي تعليق يتكلم بصراحه ولو في اي ملحوظه يقولها بس بلطف لان انا الكلام الحاد مش بيجيب معايا نتيجه ومش بفهمه لا دا بيخليني ازعل واعيط

ميرسي لزوقك وحسن الاستيعاب
حبيبتكم
هوبتي